Leano la Phetogo ya Tlelaemete le Tiragatso ya lone mo Bokone Bophirima (NW CCSIP) ke letlhomeso la porofense le le tsamaisang tiro ya go aga nonofo mo ditlamoragong tsa phetogo ya tlelaemete le tlhabologo e e tswelelang pele. Leano leno le eteletswe pele ke Lefapha la Tlhabololo ya Ikonomi, Tikologo, Tshomarelo le Bojanala (DEDECT) mmogo le Yunibesithi ya Bokone Bophirima (NWU), leano le le arabela mo ditlhokegong tsa Molao wa Phetogo ya tlelaemete(2024) le go tsamaisana le maikaelelo a naga le a boditšhabatšhaba mabapi le phetogo ya tlelaemete.

CCSIP e tlhalosa dikgato tse di mosola tsa go fokotsa mesi ya digase tse di oketsang mogote(greenhouse gases), maatla a  bokgoni jwa go ikamaganya le maemo, le go tshegetsa phetogo e e siameng ebile e akaretsang baagi le madirelo go ralala porofense. Leano le tsepamisitse mogopolo mo go kopanyeng dintlha tsa tlelaemete mo diporojekeng tsa porofense le tsa bommasepala, go netefatsa gore dikgato tsa  tlelaemete di akareditswe mo ditshwetsong tsa letsatsi le letsatsi.

Webosaete eno e dira jaaka lefelo la botlhokwa gore bannaleseabe le setšhaba ba ithute ka thulaganyo, ba tlhokomela dintlha tse di botlhokwa, ba ikwadisa jaaka batho ba ba nang le kgatlhego kgotsa ba ba amegang, le go romela ditshwaelo ka nako ya ditherisano.

Ka tirisanommogo le go dira dilo mo pepeneneng, Leano la CCSIP la Bokone Bophirima le ikaeletse go tlhama tsela e e kopanetsweng ya go itshokela phetogong ya maemo a bosa,  kgase e e kwa tlase (low-carbon), le isago e lekalekaneng ya porofense.

Ditshwaelo tsa lona di botlhokwa mo go bopeng tsela e Porofense ya Bokone Bophirima e tsibogelang phetogo ya tlelaemte ka yone.

Leano la Phetogo ya Tlelaemete le Tiragatso ya Lone mo Bokone Bophirima (NW CCSIP) le konosediwa ka tsela e e mo pepeneneng ka go akaretsang batho botlhe,  le go laletsa go tsaya karolo.

Go na le ditsela tse pedi tsa go tsaya karolo:

🌍 Ikwadise jaaka monnaseabe kgotsa motho yo o nang le kgatlhego.

Nna o itse ka dikopano tse di tlang, dikokwano tsa go tlhabana botlhale le ditshono tsa go nna le seabe.

Ka go ikwadisa, otla amogela dintshwafatso le ditaletso tsa go tsaya karolo mo thulaganyong ya CCSIP:

➡️ Ikwadise Fano

💬Romela tshwaelo.

Re amogela temogo ya gago, ditshitshinyo le dipono tsa selegae  

➡️ Romela tshwaelo ya gago fano

Ditshwaelo tsotlhe tse di amogelwang mo pakeng eno di tla kwalwa mo pegelong ya botsayakarolo jwa setšhaba e e tla nnang karolo ya thomelo ya bofelo ya CCSIP.

Mmogo re ka kgona go aga porofense ya Bokone Bophirima e e kgonang go emelana le phetogo ya maemo a bosa, le go tswelela pele. 

Moralo wa Leano la Phetego ya Tlelaemete le Tiragatso ya lone mo Bokone Bophirima (NW CCSIP) o tla nna teng mo nakong e khutswane. Nna ntse o lebile lefelo leno. 

Leano la Phetogo ya Tlelaemete le Tiragatso ya Lone mo Bokone Bophirima le latela tsela e e tlhamaletseng le thulaganyo e e akaretsang go simolola ka nako ya paakanyo go fitlha ka nako ya kgatiso.

Kgato nngwe le nngwe e kopanya tshekatsheko ya setegeniki, therisano le tlhokomelo go netefatsa gore leano la bofelo le a ikanyega, le ka dirwa , ebile le tsamaisana le Molao wa Phetogo ya maemo a Bosa (2024)

1️⃣ Go Simolola le Thulaganyo – Lwetse 2025

Setlhopha sa porojeke se fetsa pego ya go simolola tiro, se netefatsa mokgwa, thulaganyo ya nako le thulaganyo ya go tsaya karolo. Komiti ya Boeteledipele ya Porojeke (PSC) e tlhomilwe go laola tiro.

2️⃣ Tshekatsheko ya setegeniki – Diphalane 2025

Baitseanape le mafapha ba sekaseka CCSIP e e rulagantsweng go matlafatsa tshekatsheko ya ditlamorago tsa yone, ditsela tsa go fokotsa dikotsi, le leano la go e tsenya tirisong.

Letlha la botlhokwa: Kopano ya PSC ka la di 15 Diphalane 2025.

3️⃣ Go Tsaya karolo ga Batho – Ngwanatsele 2025 go Fitlha Ferikgong 2026

Go tla nna le nako ya malatsi a 30 a ditshwaelo, le motseletsele wa dikopano tsa dithuto tsa kgaolo di le nne mmogo le kopano ya porofense go naya bannaleseabe le setšhaba tshono ya go ntsha dikakanyo tsa bone.

Ditshwaelo tse di tswang mo dipuisanong tseno di tla thusa thulaganyo ya bofelo ya leano.

4️⃣ Go Kopanya le Go Amogela – Tlhakole 2026

Ditshwaelo di a sekasekwa le go kopanngwa. PSC e kopana le batsayakarolo ba ba atolositsweng go sekaseka diphetogo, mme morago e bo e di amogela.

Letlha la botlhokwa: PSC ya bofelo – Bogare jwa Tlhakole 2026.

5️⃣ Kgatiso – Mopitlwe 2026

CCSIP ya bofelo e e amogetsweng e tla tokafadiwa sentle, e direlwe popego ya semmuso, mme e phasaladiwe mo kgatisong ya pampiri le ya dijithale gore e fitlhelelwe ke batho botlhe.

Thulaganyo ya go tsaya karolo ga batho mo Leanong la Phetogo ya Tlelaemete le tiragatso ya Lone mo Bokone Bophirima (NW CCSIP) e tla dirwa ka motseletsele wa dikopano tsa thuto mo dikgaolong di le nne le kopano e le nngwe ya porofense. Dikopano tseno di diretswe go kokwanya dikakanyo, maitemogelo a selegae, le dikatlanegiso gotswa go bommasepala, baagi, dikgwebong, le bannaleseabe ba bangwe ba botlhokwa. 

Thulaganyo eno  e tla simolola ka Ngwanatsele 2025 ka Kopano ya kgaolo ya Bojanala Platinum, e e tla latelwang ke Kopano ya kgaolo ya Dr Kenneth Kaunda moragonyana mo kgweding eo. Mo tshimologong ya Sedimonthole, go tla tshwarwa dithutokatiso tsa kgaolo ya Dr Ruth Segomotsi Mompati le Ngaka Modiri Molema go feleletsa ditiro tsa kgaolo.

Kopano ya Porofense e rulaganyetswe ka Ferikong 2026, go sekaseka pegelo go tswa dikgaolong tsotlhe mmogo, mme go tla nna le dipuisano tsa dikatlanegiso tsa bofelo pele leano le amogelwa le go phatlhaladiwa.

Matlha a a tlhomameng, dinako le mafelo (gongwe le dikopano tsa inthanete) a tla begwa fano mme ditla abelwa batsayakarolo botlhe ba ba ikwadisitseng.

Sala o tlhokomela lefelo leno mme o netefatse gore o ikwadisitse jaaka motho yo o nang le seabe kgotsa yo o nang le kgatlhego ka kgokelo ya Nna le tshwaelo- Ikwadise fa go amogela kitsiso le ditaletso.